असल प्रेमीले प्रेमका खातिर आफ्नै बलिदान दिनसक्छ । तर यो दुनियामा यस्ता कलंकित कथित प्रेमीहरु पनि हुँदारहेछन् जसले कुकुरलाई मासु खुवाउन प्रेमीकाको हत्या गर्छन् ।
यो घटना हो ब्राजिलको । त्यहाँका एक फुटबलरले आफ्नी प्रेमिकालाई मारेर कुकुरलाई खान दिएको आरोपमा अदालतमा मुद्दा चल्ने भएको छ । दुइ वर्षअघि यो घटना भएको भएपनि बल्ल उनीमाथि हत्या अभियोगमा मुद्दा चल्ने भएको हो । प्रेमिकालाई अपहरण गरेको तथा यातना दिएको अभियोगमा भने उनले साढे ४ वर्षको सजायँ अहिले भोगिरहेका छन् ।
ब्राजिलका स्टार गोलकिपर ब्रूनो फर्नान्डिजले आफ्नी गर्लफ्रेन्ड तथा मोडेल एलिजा स्यामुडियोको हत्या गरी उनको मासु घरमा पालेको कुकुरलाई खान दिएको बताइएको छ । ब्रूनो र एलिजाबीच लामो समयदेखि प्रेम सम्बन्ध थियो । तर जब एलिजाले ब्रूनोसँगकै सम्बन्धबाट गर्भवती भइन् तब ब्रूनो अताल्लिए । उनले प्रेमिकालाई गर्भ तुहाउन भने तर एलिजाले बच्चालाई जन्म दिने बताएपछि ब्रूनोले एलिजाको दर्दनाक तबरले हत्या गरे ।
समाचार अनुसार २५ वर्षीय मोडेल एलिजाले बच्चा जन्माएरै छाड्ने ढिपी गरेपछि उनको हत्या गर्ने योजना बनाएर ब्रुनोले अरु ८ जना साथीको सहयोग लिएर एलिजाको अपहरण गरे । अपहरण पछि एलिजालाई कुनै अर्को सहरमा लगियो र तडपाइ तडपाइ मारियो ।
मारेर मात्र पनि ब्रूनोको चित्त बुझेन । उनले एलिजाको शवलाई टुक्राटुक्रा पारेर काटे । केही टुक्रा घरमा ल्याएर कुकुरलाई खुवाए र बँचेखुसेका टुक्राहरु डढाइदिए । तर सान्तोष नामका एक निजि जासुसले भने यो अपराधको पोल खोलेपछि ब्रूनोको कर्तुत पर्दाफास भएको हो ।